Bajram Begaj është zgjedhur presidenti i 8 i Republikës së Shqipërisë, me 78 vota pro, 4 kundër dhe 1 abstenim. Kandidatura e tij u propozua dje nga socialistët dhe në më pak se 24 orë u konkludua dhe votimi i tij për postin e presidentit, detyrë të cilën do ta marrë pas datës 24 Korrik.
Ndërkohë që ka ardhur një reagim zyrtar nga Ambasada Amerikane, ku urohet presidenti i ri. Gjithashtu vlerësohet kountributi i tij si Shef i Shtabit të Përgjithshëm në bashkëpunimin midis Shteteve të Bashkuara dhe Shqipërisë në fushën e mbrojtjes.
Reagimi i Ambasadës Amerikane:
Ambasada e Shteteve të Bashkuara të Amerikës uron Bajram Begaj për zgjedhjen e tij si Presidenti i ardhshëm i Shqipërisë. Si Shef i Shtabit të Përgjithshëm, ai kontribuoi në mënyrë domethënëse në bashkëpunimin midis Shteteve të Bashkuara dhe Shqipërisë në fushën e mbrojtjes. Ne presim me kënaqësi që të vazhdojmë të punojmë me të në detyrën e tij të re dhe të forcojmë më tej partneritetin midis vendeve tona.
Kujtojmë që një pjesë e konsiderueshme e deputëtëve vendosën ta bojkotonin procesin. Komisioni i Rithemelimit dhe LSI kanë deklaruar se do të votojnë kundër, kjo jo sepse kanë rezerva për kandidatin, por për procesin që sipas tyre ka qenë jo konsenual. Nga ana tjetër, Grupi i Enkelejd Alibajt dhe Fatmir Mediu kanë deklaruar se s’do të marrin pjesë në votim.
Nga 52 deputetë që ka PD-ja, 22 prej tyre kanë shkuar në sallë.
