Një muaj pas shpërthimit në një magazinë në pronësi të tij, në qytetin e Lushnjes që rezultoi fatale për dy persona, babë e bir, deputeti i Partisë Socialiste, Bujar Çela është rikthyer në krye të detyrës në Kuvend.
Në ngjarjen që tronditi vendin, vetë deputeti socialist mbeti i plagosur dhe duket se tashmë është rikuperuar dhe i është rikthyer normalitetit. Çela ka qenë i pranishëm në mbledhjen e grupit parlamentar të PS-së, e cila u drejtua nga Bledi Çuçi, që kërkoi një angazhim më të madh të deputetëve socialist në Kuvend.
Si ndodhi ngjarja?
Ngjarja ka ndodhur më 1 mars, kur babë e bir, Roland dhe Elidon Çela po punonin me vinç në magazinë në momentin kur ka ndodhur shpërthimi dhe kanë ndërruar jetë në vend. Ndërsa 7 të tjerë mbetën të plagosur.
Deputeti po hetohet nga prokuroria për vepra penale “Shkelja e rregullave të mbrojtjes në punë”, “Ndërtimi i paligjshëm”, dhe “Shkatërrimi i pronës nga pakujdesia”.
