Tashmë prej ditësh është lajmëruar se Gjykata Penale do të mbante seancën e radhës sa i përket çështjes “Babale”, ku i pranishëm ka qenë sigurisht edhe ish-deputeti, Ervin Salianji.
Jashtë gjykatës, pasi ka përfunduar seanca, Salianji ka dhënë një deklaratë për mediat, kur edhe është shprehur se prokuroria nuk kishte asnjë provë të re kundër tij vetëm “agjitacion e propagandë”. Salianji ka thënë se ka kërkuar arrestimin e Nushit dhe Andon Markut, pasi ka përgjime që dëshmojnë se e njohin Alizotin, por që ende nuk është marrë asnjë masë.
“Boll kam dëgjuar shokë të dënuar të Ramës në parlament. Këtu ishte një rast tjetër i shokëve të Ramës që i përdori si dëshmitarë të sajuar. Nuk kishte asnjë provë të re ndaj meje vetëm agjitacion dhe propagandë. Thuhej se Salinji donte të dëmtonte politiksht Fatmir Xhafajn. I kërkova prokurorëve të marrin nën arrest Nushin dhe Andon Markon. Të dy kanë deklaruar se nuk e njohin Alizotin por janë kapur në përgjime duke i dhënë para”, ka thënë Salianji.
Gjithashtu ish-deputeti ka thënë se nuk frikësohet, por do t’i shkojë deri në fund të vërtetës.
“Nuk më intimidojnë dot presionet e tyre por më nxisin më shumë drejt misionit tim drejt të vërtetës. Bëra atë që nuk bëri dot shtetit. Unë kam futur në burg vëllain e Fatmir Xhafajn. Do të kemi surpriza të tjera. Në tre muaj hetime prokuroria nuk më gjen dot një kontakt me Alizotin por vetëm me deputetë. Prokuroria duhet të provojë fajësinë time. Nuk ka vepër penale dhe asnjë provë”, ka thënë gjatë prononcimit të tij për mediat Ervin Salianji.
Ish-deputeti demokrat Ervin Salianji akuzohet për kallëzim të rremë lidhur me dosjen “Babale” e cila mund t’i kushtojë nga gjobë deri në 5 vite burg.
