Feriz Bardhi, është 40 vjeçari që mbeti i pajetë pak ditë më parë në qytetin e Durrësit.
Bardhi u vra me breshëri plumbash para derës së shtëpisë. Ai ndërroi jetë në sallën e operacionit, pasi shkoi i plagosur në spital, por mjekët nuk arritën dot ta mbanin në jetë.
Dyshohet se vrasja e 40-vjeçarit është portositur nga jashtë Shqipërisë. Prokuroia e Durrësit po heton këtë pistë, pasi viktima kishte konflikte të hapura në Itali. Feriz Bardhi ishte i përfshirë në grupe kriminale që ushtronin aktivitetin e drogës.
Mësohet se Bardhi kishte marrë masa për t’i paraprirë ndonjë atentati të mundshëm.
Kohët e fundit viktima kishte filluar të lëvizte me makinë të blinduar. Por, ai u godit në mes të ditës dhe në derën e vilës së tij që kishte blerë kohët e fundit në lagjen 18 të qytetit bregdetar.
Në vitin 2012 Feriz Bardhi është arrestuar nga policia italiane në Ascoli. Së bashku me një shtetas tjetër shqiptar Arif Qelia, u kapën me 700 gramë kokainë të pastër.
Ata u akuzuan për trafik ndërkombëtar të kokainës, duke u cilësuar nga policia italiane si korrierë të drogës.
Policia e Durrësit ka shoqëruar disa persona pas vrasjes së Bardhit, që kishte vetëm pak kohë që ishte zhvendosur nga Shën Vlashi, periferi e qytetit bregdetar, për të jetuar në Durrës.
Mes të shoqëruarve, janë edhe familjarë të viktimës si dhe disa shokë me të cilët shoqërohej së fundmi Feriz Bardhi.
Në vendin e krimit nuk ka pasur kamera sigurie, gjë e cila vështirëson akoma edhe më shumë punën për identifikimin e dy personave që morën pjesë në vrasjen e 40- vjeçarit.
Familjarët kanë treguar se Ferizi do të vendoste kamerat e sigurisë në vilën e sapoblerë, por teknikët nuk kishin ardhur për të bërë montimin e tyre.
