Drejtori i shkollës 9 vjeçare në fshatin Karkanjoz në Berat ka gjetur vdekjen nga Covid-19. Bëhet fjalë për qytetarin Gëzim Shkoza, pasi ka shfaqur shenjat e prekjes nga virusi ishte shtruar fillimisht në repartin e COvid-10 në spitalin rajonal të Beratit.
Pas përkeqësimit të shëndetit të tij një javë më parë, ai u dërgua për mjekim më të specializuar në spitalin Covid “Shefqet Ndroqi” në Tiranë.
Mësohet se tre ditët e fundit Shkoza ishte në intubim dhe megjithë përpjekjet e mjekëve nuk arriti ta mposhtë dot sëmundjen dhe vdiq mëngjesin e sotëm. Gëzim Shkoza, babai i tre fëmijëve jetonte në Karkanjoz ku edhe ushtroi prej më shumë se 30-vitesh profesionin e mësuesit, ndërkohë që 5-vitet e fundit ishte emëruar drejtor i shkollës 9-vjeçare të fshatit.
Kujtojmë se prej ditësh vijon numri i lartë i infektimeve nga koronavrisui në vendin tonë. Ministria e Shëndetësisë raporton se gjatë 24 orëve të fundit kanë ndërruar jetë 20 pacientë të infektuar me virusin e rrezikshëm.
I lartë mbetet edhe numri i infektimeve, ku në këto 24 orë kanë rezultuar pozitivë 764 persona. Sa i përket situatës në spitale, MSH bën me dije se “Aktualisht në spitalet COVID në Tiranë dhe tre spitalet rajonale po trajtohen 659 pacientë, 43 në terapi intensive, nga të cilët 11 pacientë janë të intubuar”.
