Avokati Kujtim Cakrani, përfaqësues ligjor i efektivit të policisë Ardian Isufi, ka reaguar për ngjarjen e dhunshme të ndodhur në një lokal në Vlorë, ku një kamarier u dhunua nga dy persona, njëri prej të cilëve ishte jashtë shërbimit.
Në deklaratën e tij për mediat, Cakrani tha se klienti i tij nuk e ka goditur kamarierin, por vetëm e ka shtyrë. “Gjestin nuk e justifikoj, është i dënueshëm moralisht, por nuk mund të lejojmë që një punonjës policie të bëhet mish për top për publikun, që kërkon dënim të ashpër për çdo incident,” tha avokati.
Ai vuri në dyshim autenticitetin e videove që janë shpërndarë në media, duke i quajtur pamje “të cunguara”. Sipas tij, ato nuk paraqesin të gjithë dinamikën e ngjarjes, ku pas episodit me kamarierin, rreth 15 persona kanë ushtruar dhunë ndaj efektivit të policisë.
Lidhur me përgjegjësinë e Isufit, Cakrani tha se dhuna fizike ndaj kamarierit është ushtruar nga miku i efektivit, ndërsa klienti i tij nuk ka qenë i përfshirë drejtpërdrejt. “Klienti im nuk ka ushtruar dhunë, por është për t’u kritikuar që nuk ndaloi shokun e tij,” theksoi ai.
Cakrani kërkoi gjithashtu hetim për dhunën e ushtruar ndaj efektivit pas incidentit, duke nënvizuar se asnjë akt i dhunshëm nuk justifikohet me një tjetër. “Fakti që është goditur kamarieri, nuk do të thotë që efektivi të dhunohet dhe dhunës t’i përgjigjemi me dhunë,” deklaroi ai.
Përsa i përket pretendimeve se Ardian Isufi ka qenë personi që ka goditur pronarin e lokalit, avokati u shpreh se edhe nëse kjo provohet, pronari duhet të kishte thirrur policinë dhe jo të përfshihej vetë në përleshje.
Në fund të deklaratës, Cakrani kërkoi publikimin e të gjitha pamjeve filmike të incidentit. “Nëse ato tregojnë qartë se klienti im ka dhunuar kamarierin dhe ka goditur pronarin e biznesit, nuk do të dalë më askund në publik,” tha ai.
Sipas tij, hetimet duhet të jenë të plota dhe të përfshijnë edhe personat që, sipas avokatit, kanë ushtruar dhunë ndaj efektivit të policisë pas ngjarjes.
Deklaratat e avokatit Kujtim Cakrani duken të shkëputura nga realiteti i fakteve tashmë të bëra publike. Pamjet filmike të incidentit janë shpërndarë që dje dhe tregojnë qartazi se kamarieri është sulmuar fizikisht nga dy burra. Ato dëshmojnë jo vetëm dhunë me shtyrje dhe goditje, por edhe një përballje psikologjike me tone presioni dhe kërcënimi verbal.
Në këtë kontekst, përpjekja për të relativizuar përgjegjësinë penale apo morale të klientit të tij bie ndesh me atë që publiku tashmë e ka parë me sytë e vet. Të kërkosh “të hapen pamjet”, kur pamjet janë hapur dhe flasin vetë, është jo vetëm absurde, por edhe një përpjekje për të turbulluar ujin në një rast ku gjithçka është tepër e qartë.
