Air Albania, e ashtuquajtura krenari kombëtare, po ndjek falimentim të projektuar, ku në fund faturën do ta paguajnë sërish taksapaguesit shqiptarë. Akuzat e ditëve të fundit për falimentin e kompanisë kanë risjellë në vëmendje atë që ishte e qartë prej kohësh – një skemë të mirëmenduar.
Skandali më i madh nuk thjesht falimentimi. Skandali është se si një kompani lejohet të vazhdojë të grumbullojë borxhe pa fund, të mos paguajë detyrime ligjore, teksa përdoret si mjet për përfitime private. Me avionët e Air Albania është bërë turizëm politik me paratë e shqiptarëve, duke ditur se në fund çdo shpenzim do të mbulohet nga buxheti i shtetit.
Vetëm së fundmi, Gjykata e Shkallës së Parë në Tiranë vendosi sekuestro konservative për një borxh prej 4.5 milionë eurosh. Jo vetëm kjo! Kompania ka grumbulluar 18 milionë euro detyrime aeroportuale e tatimore, plus 5 milionë të tjera ndaj serviseve të huaja. Borxhe këto që po rriten çdo ditë.
Skema është e njëjtë me atë të ARMO në Vlorë, ku kompania private inskenoi lënien pa paga të punonjësve, që pagat t’i paguante qeveria nga taksat tona. Ndërkohë, në prapaskenë kompania private ishte patronazhiste e qeverisë.
Pra: Turkish Airlines zotëron 49%, firma e Sinan Idrizit 41%, dhe shteti shqiptar vetëm 10%. Një strukturë e projektuar që fitimet t’u shkojnë privatëve, ndërsa humbjet të mbulohen nga taksapaguesit (ne). Mjafton të shohim se firma e Idrizit u krijua pikërisht në 2018, të njëjtin vit me Air Albania, ndërsa që atëherë bilancet financiare mbahen sekret.
Përdorimi i avionëve si charter privatë nga kryeministri Rama ka qenë vetëm pjesë e kësaj skeme. Ndërsa udhëtimet e panumërta nga Berlini në Paris e nga Roma në Stamboll krijojnë borxhe të reja, askush nuk shqetësohet – në fund do t’i paguajë shteti a.k.a. taksapaguesit shqiptarë.
Punonjësit e Air Albania janë lënë gjithashtu pa paga e sigurime shoqërore. Në aeroporte të ndryshme, avionët nuk furnizohen me karburant për shkak të borxheve. Madje, emri i kompanisë u hoq me turp nga stadiumi kombëtar se nuk paguan dot as tarifën e sponsorizimit. Por gjithçka duket se po ndodh sipas planit – sa më shumë borxhe të grumbullohen, aq më “e justifikuar” do të jetë ndërhyrja e shtetit për të “shpëtuar” kompaninë.
Skandaloze është edhe praktika e rrezikshme e shitjes së biletave mbi kapacitetin e avionit. Në Bolonja u lanë në mes të rrugës dhjetëra shqiptarë, sepse ishin shitur 40 bileta më tepër. Air Albania sot është kthyer në një kompani që emeton vetëm borxhe, një aset toksik që qëllimisht po helmon financat publike.
Pse institucionet rrinë duarkryq përballë këtij skandali, kësaj praktike korruptive në kurriz të taksapaguesve shqiptarë? Është koha që institucionet të ndërhyjnë dhe të vendosin para përgjegjësisë ata që e kthyen Air Albania nga një ëndërr kombëtare në një ankth financiar për xhepat e shqiptarëve!
/gazetareforma.com
