“Njerëzit ikin nga jeta jonë, sepse ashtu e do Zoti, nga zemra jonë nuk ikin asnjëherë, sepse kështu duam ne…”, këto fjalë përshkruajnë me dhimbje dhe mall përjetimin që la pas humbja tragjike e dy të miturve, Spridhon Kristofor dhe Kleoni Fezollar, të cilët u mbytën në lumin Arakhtos në Greqi.
Të dy fëmijët, 14 dhe 12 vjeç, njëri me prejardhje greke dhe tjetri shqiptar, prisnin një ditë të mbushur me aventura, por u përballën me fatin më të keq kur uji i lumit iu mori frymën.
Edhe pse Ledian Goga, një emigrant shqiptar, u hodh me guxim në ujë dhe arriti të shpëtonte një jetë, fatkeqësisht dy vogëlushët nuk ia dolën dhe ndërroi jetë në spital.
Në një akt human dhe plot madhështi, familjet e tyre vendosën që organet e Spridhonit dhe Kleonit të dhuroheshin për të shpëtuar jetë të tjera.
Procedura për organet e 14-vjeçarit u krye ditën e djeshme, ndërsa sot do të kryhet ajo e 12-vjeçarit shqiptar. Organizata Kombëtare e Transplanteve në Greqi po mbulon shpenzimet funerale, pas urdhrit të Ministrit të Shëndetësisë, Adonis Georgiadis.
Ledian Goga, i cili u shpall hero për veprimin e tij të guximshëm, po trajtohet aktualisht në spitalin e Artës, ku ndodhet në gjendje stabile.
Pas shpëtimit të dy fëmijëve, ai përjetoi probleme shëndetësore, me gëlltitje dhe vështirësi në frymëmarrje, gjë që e detyroi të kërkonte ndihmë mjekësore. Ministri Georgiadis ndërhyri personalisht për të siguruar trajtimin e duhur.
Shteti grek nderon këtë akt heroik duke i dhënë Gogës nënshtetësinë greke, një simbol i falënderimit dhe respektit për guximin e tij.
Ndërkohë, rrjetet sociale janë mbushur me mesazhe ngushëllimi dhe përkujdesjeje për dy fëmijët që humbën jetën, ndërsa shokët e tyre shkruajnë me mall: “Do të mbeteni përgjithmonë në zemrat tona, ikët si heronj.”
Në mes të dhimbjes dhe humbjes, veprimi i tyre përmes dhurimit të organeve sjell dritë dhe shpresë për shumë jetë të tjera.
Ledian Goga qëndron si një simbol i kurajos dhe humanizmit që nuk njeh kufij, duke na kujtuar se edhe në momentet më të errëta, njerëzimi ka forcën për të ndriçuar botën.
