Ngjarja e rëndë në Shkodër, ku mbetën të vrarë dy persona dhe u plagosën dy të tjerë, ka marrë përmasa edhe më alarmante pas dëshmive të reja. Gazetarja e Euronews Albania, Matilda Braho, raportoi se sipas familjarëve, kamarierja e plagosur ka treguar se ka parë dy persona mbi motor, çka hedh dyshime se autori Ragip Gilaj nuk vepronte i vetëm.
“Vajza, pasi ka dalë nga operacioni dhe është kthyer në vetëdije, ka thënë se ka parë dy persona në motor, jo vetëm një. Supozohet se kanë qenë dy autorë”, tha Braho nga spitali i Shkodrës.
Edhe gazetari Eni Ferhati konfirmoi në “Now” se hetuesit dyshojnë për një bashkëpunëtor në zonë, i cili mund të ketë sinjalizuar lëvizjet e shënjestrës, Erogen Vaso. “Është e pamundur që Gilaj të kishte informacion kaq të saktë pa pasur një njeri tjetër që e ndihmoi. Hetuesit mendojnë se ka pasur dikë që e sinjalizoi kur Vaso doli nga banesa”, tha Ferhati.
Ndërkohë, profesori i kriminalistikës, Ervin Karamuço, bëri publike një tjetër detaj tronditës: arma e përdorur ishte një Uzi GAL e prodhimit izraelit, me kapacitet prej 900 plumbash në minutë, armë që përdoret nga profesionistë dhe ka qenë pjesë e arsenalit të shërbimeve sekrete amerikane në vitet ’80. “Është hera e parë që një armë e tillë shfaqet në Shqipëri. Kjo tregon për rritjen e fuqisë së grupeve kriminale që tashmë kanë në dispozicion armatime të sofistikuara për vrasje me pagesë”, tha ai.
Nga dëshmitë e mbledhura në vendngjarje, gazetari Teodor Gjergo raportoi se Gilaj ka ndjekur objektivin edhe pas banakut. “Vaso u përpoq të fshihej, por autori e ndoqi dhe e qëlloi disa herë, derisa e rrëzoi në tokë”, tha ai.
Hetimet vijojnë, ndërsa policia po punon për të identifikuar nëse autori ka pasur realisht një bashkëpunëtor dhe kush ka mundur të jetë urdhëruesi i vërtetë i masakrës.
