Teksa muajin e kaluar institucionet ngritën alarmin për numrin e lartë të aksidenteve, duket se edhe muaji shkurt do regjistrojë një bilanc negativ.
Së fundmi, një aksident i rëndë ka ndodhur në fshatin Mashan të qytetit të Gramshit, ku një automjet tip “Golf” ka dalë nga rruga.
Si pasojë, ka mbetur e plagosur rëndë drejtuesja e mjetit e identifikuar si Klara Hoxha.
Sipas informacioneve paraprake, 30- vjeçarja ka humbur kontrollin e makinës, e cila doli nga rruga dhe u përplas me bordurat anësore.
Hoxha u transportua fillimisht në spitalin e Gramshit, por si pasojë e plagëve të rënda që ka pësuar është nisur për në Spitalin e Traumës në Tiranë.
Kujtojmë se aksidentet e shumta rrugore kanë bërë që masat ndaj shoferëve të shtohen dhe muajin që lamë pas policia paralajmëroi se shumë shpejt, përveç dregerit të alkoolit, do përdorë edhe dragerin për të parë nëse drejtuesit kanë konsumuar lëndë narkotike.
Po ashtu, ministri i Brendshëm, Sandër Lleshaj deklaroi se për herë të parë në Shqipëri shoferët do t’i nënshtrohen të ashtuquajturit ‘testi i idiotit’, për të parë gjendjen e tyre psikologjike kur efektivët shohin sjellje të dyshimta.
