Ditën e sotme pas atentatit ndaj ish-deputetit policia e Shkodrës ka ngritur disa postblloqe për kapjen e autorit të plagosjes së 64-vjeçarit Pashko Ujka, ish-kreu i Komunës Velipojë si dhe ish-deputet i Aleancës Demokratike.
Policia vijon krehjen e zonës, teksa mësohet se Ujka ndodhet në spital, por nuk dihet nëse është jashtë rrezikut pa jetën për shkak të plumbit që ka marrë në shpinë.
“Rreth orës 18:15, në lagjen “Vasil Shanto” Shkodër, në rrethana ende të paqarta është plagosur me armë zjarri shtetasi P. U., 64 vjeç, i cili ndodhet në spital nën kujdesin e mjekëve.
Në vendngjarje kanë mbërritur menjëherë shërbimet e Policisë dhe vijon krehja e zonës me qëllim kapjen e autorit.
Grupi hetimor nën drejtimin e Prokurorisë po vijon punën për sqarimin e rrethanave dhe zbardhjen e ngjarjes”, njoftoi zyrtarisht policia e Shkodrës.
Është rënduar gjendja shëndetësore e Pashko Ujkës i cili u plagos pak momente më parë me armë zjarri.
Familjarët e ish-kryetarit të komunës së Velipojës bëjnë apel për ndihmë. Ata ftojnë të gjithë personat që kanë gjakun A negativ në spitalin rajonal të Shkodres të dhurojnë gjak.
Ngjarja ka ndodhur në afërsi të shtëpisë së tij, në një lulishte pranë Kishës Ortodokse ku ai ka qenë duke ecur. Ujka është plagosur në shtyllën kurrizore. Dyshimet e para të policisë janë që ngjarja të ketë lidhje me periudhën 2011-2015 kur Ujka ka shërbyer si kryetar komune ndërkohë që ai është plagosur edhe herë tjeter.
