Në muajin nëntor të 2019 bëri bujë atentati ndaj prokurorit Arjan Ndoj në mbikalimin e Shkozetit.
Nga atentati mbetën të plagosur Ndoj dhe Aleksandër Laho, i njohur ndryshe si Rrumi i Shijakut, dhe humbi jetën shoferi i prokurorit, Andi Maloku.
Listës së kërkimeve për këtë ngjarje i është shtuar edhe një grup kriminal jashtë vendit.
Sipas ‘News24’ Prokuroria e Posaçme Kundër Korrupsionit(SPAK) i ka dërguar letërporosi një prej vendeve të BE-së, lidhur me persona me rekorde kriminale të implikuar në atentat.
Informacionet jozyrtare kanë thënë se bëhet fjalë për disa eksponentë të botës së krimit, të njohur edhe nga autoritetet shqiptare, si pjesë e një grupi që operon në Durrës e Fushë Krujë.
Akuza është tashmë në pritje të ekzekutimit të letër-porosisë.
I arrestuar deri me tani është vetëm 34-vjeçari Redjan Rraja, i cili i ka mohuar akuzat.
Aludohet se krimi ka lidhje me përplasjet e grupeve kriminale për çështjen e pronave në bregdet.
Kështu, targeti i këtij atentati mund të ketë qenë edhe miku i prokurorit Ndoj, Aleksandër Laho, i njohur në botën e krimit.
