Juristi Mitri Prifti është arrestuar nga policia, pasi ndaj tij ishte vendosur masa e sigurisë “arrest me burg”. Ai akuzohet për veprat penale “Vrasja me paramendim”, e mbetur në tentativë dhe “Armëmbajtja pa leje”.
Mitri dyshohet se ka tentuar të vrasë me armë zjarri Edison Begajn në Vlorë, i cili si pasojë e të shtënave mbeti i plagosur.
Ngjarja ndodhi më 29 maj 2021, teksa Begaj po udhëtonte në makinë me fëmijët e tij. Një person me unifromë policie i zuri pritë, ndërsa sapo ai doli nga mjeti u përball me plumbat. Mësohet se mes të dyve ka pasur konfliktet të mëparshme që kanë çuar në atentatin ndaj Begajt.
Njoftimi i policisë:
Vlorë/Ekzekutohet vendimi i Gjykatës për 36-vjeçarin e shpallur në kërkim, për tentativën e vrasjes së shtetasit E. B, të ndodhur më 29 maj 2021, në fshatin Kaninë.Nga Sektori për Krimet e Rënda në DVP Vlorë u bë ekzekutimi i vendimit të Gjykatës së Shkallës së Parë Vlorë, për shtetasin M. P, 36 vjeç, banues në Tiranë, e cila ka vendosur masën e sigurisë “Arrest në burg” për veprat penale “Vrasja me paramendim”, e mbetur në tentativë dhe “Armëmbajtja pa leje”.Ky shtetas dyshohet se për motive të dobëta, ka tentuar të vrasë me armë zjarri, shtetasin E. B, 41 vjeç, i cili si pasojë e të shtënave ka mbetur i plagosur.
