Ditën e sotme zbardhet dëshmia e të dashurës së 27-vjeçarit Aleksandër Sadikaj në polici. Sipas saj një ditë para atentatit, ai ka qenë në Memaliaj dhe në Tiranë është kthyer nga mesdita. Ajo gjithashtu ka shtuar se mbrëmjen e datës 9 së bashku me Sadikajn, ata kanë darkuar në një lokal në zonën e Komunës së Parisit dhe se makinën e kishin lënë në një qendër tregtare. Ajo gjithashtu ka theksuar se në momentin që pas darkës kanë shkuar te makina, ka vënë re se kapaku i serbratorit të makinës ka qenë i hapur.
“Më datë 9 qershor në drekë ai u kthye nga Memaliaj, ku kishte fermën ‘Sanco Farm’. Në mbrëmje parkuam makinën në katin minus 2 tek parkingu i një qendre tregtare në zonën e Komunës së Parisit. Darkuam në një lokal në zonë dhe kur u kthyem, vura re se kapaku i llamarinës së serbatorit të makinës ishte i hapur. I thashë Aleksandrit, por ai nuk e vrau mendjen. E mbylla vetë dhe vazhduam normalisht rrugën. Parkuam makinën para portës së banesës si përherë. Gjatë natës nuk kam dëgjuar asgjë të dyshimte dhe kur kam dalë Aleksandri ishte në gjumë”, ka deklaruar ajo.
Ajo po ashtu ka theksuar se atë ditë ka dalë herët nga shtëpia, pasi do të shkonte në punë, ndërkohë që 27-vjeçarin e ka lënë në gjumë.
“Në orën 14:30 më telefonoi një shok i Aleksit dhe më pyeti ku ishte ai, sepse kishte parë një lajm. Telefonova menaxherin e lokalit dhe ai fillimisht më tha që nuk dinte gjë. Por pas këmbënguljes time, më tha që ishte djegur një makinë tek TEG-u. U nisa për atje, por kishte shumë trafik. Fola me kunatin e Aleksit dhe më tha që Aleksi ishte në spital dhe nuk ishte mirë. U nisa për tek Trauma”, ka thënë e dashura e tij.
Aleksandër Sadikaj, 27 vjeç është vrarë në një atentat me tritol me telekomandë. I riu me precedentë penalë ka qenë duke udhëtuar me makinën që rezulton të jetë në pronësi të Petrit Osmanit në momentin që atentatorët kanë shpërthyer tritolin me telekomandë. Sadikaj u nxorr pa gjymtyrë nga mjeti dhe kalimtarë të rastit e dërguan në spital ku dhe ndërroi jetë. 27-vjeçari është skeduar për një sërë veprash penale si vjedhje, vrasje, plagosje dhe mosbindje e kundërshtim të forcave të policisë. Hetimet janë fokusuar në të shkuarën e të riut, por nuk përjashtohet mundësia që atentatorët të jenë ngatërruar e që shënjestra e tyre të ketë qenë Osmani.
