Qyteti i Laçit është tronditur këtë mëngjes nga një atentat të bërë në zonën e quajtur Sanxhak.
Raportohet se i vdekur ka mbetur biznesmeni 55-vjeçar, Rakip (Pilot) Rroli.
Nga informacionet e para mësohet se viktima ishte duke udhëtuar me mjetin e tij, ku është qëlluar me armë.
Shërbimet e policisë, kanë shkuar menjëherë në vendngjarje dhe kanë rrethuar zonën. Po ashtu, janë ngritur edhe pika kontrolli, me qëllim kapjen e autorit/ve.
Drejt Laçit, janë nisur dy grupe të FNSH si dhe një grup me specialistë të Departamentit të Policisë Kriminale, të cilët do të zbardhin të tjera detaje nga kjo ngjarje e rëndë.
Detajet e fundit tregojnë se Rakip Roli u ekzekutua nga dy persona që kanë qenë duke lëvizur në këmbë. Mësohet se autorët i kanë dalë përpara automjetit që drejtohej nga viktima, dhe kanë qëlluar në drejtim të tij me breshëri plumbash. Roli ka humbur kontrollin e automjetit, duke u përfshirë në një aksident. Ai ka përplasur një automjet tjetër dhe më pas ka përfunduar në një kanal pranë zonës ku ka ndodhur ekzekutimi. Mjeti i tij ka ecur dhe për disa metra pas breshërisë së plumbave, dhe ka përplasur dy mjete të tjera.
Mësohet se Rroli ishte biznesmen në fushën e materialeve të ndërtimit. Viktima ka ndërruar identitetin e tij, pasi më parë ka pasur emrin Rakip Roli, dhe ka qenë i përfshirë në një ngjarje kriminale të ndodhur 10 vite më parë. Policia po punon për kapjen e autorëve të vrasjes.
