Një atentat mafioz mësohet se ka ndodhur ditën e djeshme në Brazil, ku është ekzekutuar një 47-vjeçar shqiptar.
Bëhet me dije se shqiptari i identifikuar si Ilir Zelka ësht ekzekutuar në qytetin Jardins të Sao Paulos.
Sipas mediave lokale braziliane, shqiptari ishte duke ngrënë në restorant “Cyrih” në mes të qytetit të Jardins, në momentin kur një person i paidentifikuar iu afrua me motor dhe hapi zjarr në drejtim të tij.
Autoritetet policore kanë njoftuar se shqiptari, i cili kishte prej 20 nëntorit që qëndronte në një hotel të zonës, frekuentonte rregullisht të njëjtin restorant dhe ishte duke ngrënë në momentin kur u qëllua.
Dëshmitarët okularë deklaruan se autori ishte veshur me një këmishë të kuqe dhe skafandër ngjyrë rozë.
Policia e Jardins po e heton këtë rast në pistën e tentativës për grabitje.
Pas atentatit, autori u largua me shpejtësi nga vendi i ngjarjes, duke braktisur motorin tip “Honda CG 150” që u sekuestrua nga policia.
Mësohet se 47-vjeçari shqiptar Ilir Zelka u transportua me urgjencë drejt spitalit, por nuk mundi që t’i mbijetonte plagëve të marra./GazetaReforma.com/
