Një shpërthim me lëndë plasëse ka tronditur sot qytetin e Shkodrës, duke lënduar punonjësin e Tatimeve, Enea Busukja. Ngjarja ndodhi rreth orës 11:35 në lagjen “Ndoc Mazi”, në zonën e njohur si “Arra e Madhe”.
Sipas të dhënave paraprake, shpërthimi ndodhi në momentin kur Busukja ndezi automjetin e tij, i cili ishte i parkuar në rrugë. Nga shpërthimi, 38-vjeçari mbeti i plagosur dhe u transportua menjëherë në spital, ku ndodhet jashtë rrezikut për jetën.
Forcat e Policisë mbërritën menjëherë në vendngjarje, duke rrethuar zonën dhe nisur hetimet për zbardhjen e atentatit.
Në njoftimin zyrtar, Policia e Shtetit bën të ditur:
“Rreth orës 11:35, në lagjen ‘Ndoc Mazi’, në momentin që shtetasi E. B. ka ndezur automjetin e tij, ka shpërthyer një sasi lënde plasëse në automjet. Si pasojë është dëmtuar shtetasi E. B., 38 vjeç, i cili është dërguar në spital dhe aktualisht është jashtë rrezikut për jetën. Grupi hetimor, në drejtimin e Prokurorisë, po kryen veprimet për zbardhjen e rrethanave të rastit, identifikimin dhe kapjen e autorit ose autorëve.”
Hetimet vazhdojnë për të zbuluar motivet e mundshme dhe autorët e këtij atentati.
