Kur rendisim njerëzit më të sukesshëm në vend, Luiza Gega është pa diskutim pjesë e listës, e cila ka triumfuar shpesh nëpër pistat e vrapimit.
Pavarësisht se shpesh na ka bërë krenarë, ajo ka marrë në këmbim shumë pak nga shteti shqiptar.
Edhe pse më parë Gega ka folur lidhur me sa pak mbështetje u jep qeveria shqiptare ndër vite sportistëve, duket se asgjë s’ka ndryshuar për mirë.
Së fundmi, atletia ka reaguar përmes një statusi në Instagram, ku i ka bërë thirrje ministrisë së Arsimit dhe Sportit që të marrë shpërblimet që i takojnë. Ajo shprehet se vetëm një VKM e cila ka dalë para dy vitesh, ka arritur të marrë diçka si shpërblim për të gjithë punën e saj.
Reagimi i Luiza Gegës:
“Sot e nisëm ditën me doping control. Në fakt shumë po shumë ditë të vitit janë të tilla ku që në pikë të mëngjesit je i detyruar të bësh gjak dhe urinë. Kam që në 2023 që jam në këtë sistem dhe më pëlqen fakti sepse vërtetë dua t’u tregoj qoftë të gjithë sistemeve apo qoftë dhe të rinjve që gjërat e mëdha arrihen dhe duke punuar fort.
Dhe me gjithë respektin nuk ka asnjë sportist në historinë e Shqipërisë të ketë kryer kontrolle aq sa kryej unë brenda gare & jashtë gare. Dhe si për çudi dje marr vesh që ministria e Arsimit dhe Sportit nuk më jep shpërblim për një aktivitet ku nuk paska patur kontroll, ku sportistën nuk e dinë nëse ka apo s’ka kontroll, por detyra jonë është të jemi gati sa herë na kërkojnë për të bërë kontroll.
E di çfarë më vjen keq? Që kam gjithë jetën time që investoj dhe vetëm dy vitet e fundit me ndryshimet e (VKM) kam arritur të marr diçka, sigurisht me djersën time asgjë po asgjë të falur. Edhe këtu gjithmonë gjejnë formë për të bezdisur.
Aq më tepër që jam në vitin më të rëndësishëm, vitin Olimpik. Por për fat të keq askush nuk e kupton rëndësinë e këtij viti. Unë nga institucionet përkatëse për të më thënë “Bravo”, kam nevojë që të më japin atë që më takon dhe të përpiqen më shumë për sportin. Faleminderit & nuk do ta lë me kaq”.
