Në Shqipëri nuk ka asnjë rast me koronavirus, ndërsa deri më tani janë testuar 18 persona, të cilët kanë rezultuar negativë.
Konfirmimi ka ardhur nga ministrja e Shëndetësisë, Ogerta Manastirliu, gjatë mbledhjes së Task-Forcës.
Më tej ajo shtoi se janë rialokuar 1 milion dollar në buxhetet e spitaleve, për të përballuar çdo skenar të mundshëm.
“Shqipëria nuk mund të jetë imun ndaj një rreziku si koronavirusi, por jemi bashkë për të bërë më të mirën e mundshme. Deri më tani nuk ka asnjë rast të konfirmuar, janë testuar 18 persona, që rezultojnë negative.Përveç mjeteve të mbrojtjes personale dhe stokut ekzistues, ka nisur puna për të shpërndarë 1.2 mln maska kirurgjikale në strukturat e parësorit dhe spitale. 1 mln $ janë rialokuar dhe janë shtesë në buxhetet e spitaleve për të patur stokun e mjaftueshëm për cdo skenar potencial.”- u shpreh Manastirliu.
Përsa i përket situatës në vendet fqinje, në Greqi është shënuar rasti i katërt, ndërsa në Italia numëron 17 viktima dhe mbi 650 raste.
Lajmi i mirë është se në Itali po rritet numri i të shëruarve, ku deri më tani numërohen 45.
