Deputeti demokrat dhe Sekretari i Grupit Parlamentar të PD, Arbi Agalliu ka reaguar për krizën energjitike në një deklaratë për mediat. Agalliu është shprehur se kjo është një krizë korrupsioni që i ka themelet në abuzimin e tenderave me miliona euro që zhvillon OSSHE.
Më tej ai theksoi se nuk ka pasur asnjë investim real në sektorin e energjisë dhe vuri në dukje se qeveria nuk e ka përmendur në asnjë pikë çfarë do të ndodhë me çmimin e energjisë për biznesin e madh.
Deklarata e plotë:
Përshendetje të nderuar qytetarë!
Sot dëgjuam se si qeveria i faturon tregjeve ndërkombëtare krizën të cilën e artikulon përdite. Por në të vërtetë problemi është tjetërkund.
Kjo është një krizë korrupsioni, kjo krizë i ka themelet në abuzimin e tenderave me miliona euro që zhvillon OSSHE.
Kjo krizë buron nga punësimi në administratën publike dhe në OSSHE të qindra patronazhistëve që paguhen nga taksat e shqiptarëve. Kjo krizë e ka themelin në abuzimin dhe vjedhjen që bëhet në këtë sektor.
Ne nuk kemi asnjë investim real në sektorin e energjisë në Shqipëri.
Dëgjuam qeverinë sot se si tha që nuk do të rritet çmimi i energjisë elektrike për konsumatorin dhe për biznesin e vogël, por në asnjë moment nuk dëgjuam se çfarë do te ndodhë me çmimin e energjisë elektrike për biznesin e madh.
Është e pashmangshme nëse do të kemi rritje të çmimit të energjisë elektrike për këte sektor të mos preket qytetari shqiptar.
Njerëzit, qytetarët, konsumatorët, blejnë produkte dhe shërbime që ofrohen nga biznesi i madh dhe në këtë kontekst xhepi i çdo shqiptari do të rëndohet në mënyrë të pashmangshme.
Të nderuar qytetarë! Kriza nuk vjen nga rritja e çmimit të tregjeve ndërkombëtare. Kriza i ka themelet pikërisht në abuzimet dhe në korrupsionin që kjo qeveri bën.
Ju faleminderit!
