Faza e parë e hapjes graduale të Kosovës ka ndeshur në rezultate negative, pasi në ditët e fundit numri i rasteve të reja ka qenë i lartë.
Megjithatë, ditën e sotme kurba është ulur sërish pasi Instituti Kombëtar i Shëndetësisë Publike të Kosovës ka njoftuar se sot janë identifikuar 8 raste të reja, nga 24 që u raportuan dje, duke e çuar numrin total të të prekurve në 927.
Rastet pozitive janë raste kontakti nga: komuna e Rahovecit 4 raste, komuna e Mitrovicës 2 raste dhe komuna e Vushtrrisë 2 raste.
Sakaq, ditën e sotme nuk raportohet për asnjë të shëruar, dhe sipas të dhënave të ditës së djeshme janë shëruar në total 671 pacientë, duke vijuar të jetë më i madh se numri i rasteve aktive.
Sakaq, nga fillimi i epidemisë deri tani 29 persona kanë humbur betejën përballë Covid-19.
Prej ditësh në Kosovë ka nisur faza e parë e lehtësimit të masave që përfshin periudhën nga 4 deri më 18 maj dhe gjatë kësaj kohe do të hapen bizneset, si: ndërtimtaria dhe patundshmëria, tregtia e automjeteve, pjesërisht tregtia me pakicë, pjesërisht riparimi i artikujve personalë dhe i orendive, si dhe zyrat e konsulencës.
Faza e dytë fillon nga 18 maji deri më 2 qershor dhe gjatë saj do të fillojë operimi i bizneseve, si: tregtia me pakicë, dentistët dhe fizioterapeutët, floktarët, tregu i gjelbër, gastronomia, transporti hekurudhor, transporti urban dhe ndër-urban dhe qendrat e thirrjeve.
Faza e tretë, ndërkaq, hyn në fuqi më 2 qershor e deri në vendimin e radhës dhe do të lejohen transporti urban dhe ndër-urban, taksitë, gastronomia, provimet në arsimin e lartë, testi i maturës dhe arritshmërisë, hapja e kinemave, e teatrove dhe hapja selektive e aktiviteteve sportive.
TETË RASTE ME COVID-19!
Sot më 13 maj 2020, në Laboratorin e Mikrobiologjisë Molekulare në IKSHPK me metodën RT-PCR, janë testuar gjithsej 255 mostra të marra nga Klinika Infektive dhe gjurmimi i kontakteve të rasteve në terren. Me SARS-CoV-2, janë konfirmuar 8 raste. Rastet pozitive janë raste kontakti nga: komuna e Rahovecit 4 raste (sipas vendbanimit: 4 raste Rahovec), komuna e Mitrovicës 2 raste (sipas vendbanimit: 2 raste Mitrovicë) dhe komuna e Vushtrrisë 2 raste (sipas vendbanimit: 2 raste Vushtrri). Nga data 08 shkurt deri më 13 maj 2020, në Laboratorin e Mikrobiologjisë Molekulare në IKSHPK me metodën RT-PCR, janë testuar gjithsej 10.642 mostra të dyshimta në virusin SARS-CoV-2 dhe prej tyre pozitive rezultojnë gjithsej 927 raste, me gjithsej 29 raste të vdekjes të cilët kanë pasur sëmundje të tjera shoqëruese. Në IKSHPK në vazhdimësi përgjatë 24 orëve janë duke u kontaktuar dhe mbikëqyrë të gjitha kontaktet e rasteve, si dhe kontaktet e kontakteve duke i obliguar për vetëizolim dhe të kërkojnë ndihmë mjekësore nëse kanë simptome. Në nivel global, nga data 31 dhjetor 2019 deri më 13 maj 2020 sipas Worldometers, janë raportuar gjithsej 4.394.660 raste të COVID-19 dhe 295.706 raste të vdekjes.
