Lufta kundër kultivimit të bimëve narkotike në vend vijon, ndërsa në qarkun e Shkodrës janë evidentuar dhe asgjësuar mbi 16 mijë bimë të dyshuara si kanabis.
Policia e Shtetit bëri të ditur se si pjesë e operacionit të koduar “Koordinata”, janë gjetur dhe asgjësuar gjithsej 16 755 bimë të dyshuara narkotike Cannabis Sativa, ndërsa janë sekuestruar 320 kilogramë degë me boçe kanabisi në proces tharjeje.
Sipas njoftimit zyrtar, operacioni u zhvillua në të gjithë territorin e qarkut Shkodër nga strukturat e Drejtorisë Vendore të Policisë dhe komisariatet përkatëse, në bashkëpunim me Forcat e Ndërhyrjes së Shpejtë Tiranë.
Gjatë kontrolleve në njësitë administrative Pult, Shalë, Postribë dhe Shosh, shërbimet e Komisariatit të Policisë Shkodër gjetën dhe asgjësuan 15 852 bimë të dyshuara si kanabis, si dhe sekuestruan 320 kilogramë degë me boçe që ndodheshin në proces tharjeje.
Në njësinë administrative Kastrat, Komisariati i Policisë Malësi e Madhe zbuloi dhe asgjësoi 429 bimë të tjera, ndërsa në Shllak dhe Temal, Komisariati i Policisë Vau i Dejës konstatoi dhe asgjësoi 474 bimë të dyshuara.
Policia thekson se puna hetimore vijon për të identifikuar dhe arrestuar autorët e përfshirë në këtë aktivitet të paligjshëm.
