Ditën e sotme në stadiumin “Air Albania” morën vaksinën artisti i madh Reshat Arbana dhe bashkëshortja e tij.
Lajmin e bëri të ditur vetë ministrja e Shëndetësisë, Ogerta Manastirliu me fotot e publikuara në rrjetet sociale nga procesi i vaksinimit. Por ai të cilit Reshat Arbana i ka kërkuar këshillë, ka qenë kreu i Urgjencës Kombëtare, Skënder Brataj. Në një postim në Facebook Brataj shkruan se ishte një kënaqësi e madhe për të që t”i jepte mendim nëse duhej të vaksinohej apo jo, një legjende të kombit shqiptar si Reshat Arbana.
Brataj falenderon Reshat Arbanën dhe bashkëshorten e tij që e lejuan të bëhej pjesë e këtij mesazhi të rëndësishëm sensibilizues për vaksinimin.
Postimi i Bratajt:
VLERA E VAKSINIMIT!
Sot pata kënaqësinë të jepja mendimin tim profesional për avantazhet e bërjes së vaksinës zotit Reshat dhe Drita Arbana, pastaj ti shoqëroja legjendën e artit shqipëtar dhe Dritën, në stadiumin arena kombëtare. A ka kënaqësi më të madhe që vlera e një kombi si Reshat Arbana të të kërkoj mendim nëse duhet ta bëj apo jo vaksinën? A ka mesazh më të mirë që ky vigan i artit shqipëtar i përcjell qytetarëve shqipëtar që të bëjnë vaksinën për të shpëtuar nga kjo pandemi sa më pare? A ka vlerë më të madhe për të qartësuar se çfarë duhet të bëjmë në këtë moment të pandemisë?
Faleminderit zoti Reshat Arbana, faleminderit zonja Drita Arbana që më lejuat sot të bëhem pjesë e këtij mesazhi sensibilizues!
Ne u vaksinuam, bëje dhe ti!
https://www.facebook.com/SkenderBratajZyrtare/posts/218765296662039
