Është shuar në moshën 78-vjeçare aktori Anastas Kristofori. Ky i fundit njihet për publikun shqiptar si aktori i preferuar i komedisë “Pallati 176”. Bëhet fjalë për shokun Perikli, ashtu siç thirrej në komedinë shqiptare i cili ishte babai i Elsës së Fredit dhe që nuk donte për krushk, Jovan Bregu.
Aktori ka lindur më 28 nëntor të vitit 1943 në fshatin Vuno të rrethit të Vlorës. Pas mbarimit të studimeve të larta në Institutin e Lartë të Arteve (sot Akademia e Arteve) në vitin 1970,fillon punën me Trupën Profesioniste të Teatrit Popullor (sot Teatri Kombëtar) në vitin 1971. Të shumtë do të jenë interpretimet e tij në skenën e këtij teatri. Këtu mund të përmendim rolin e zotit Dëllfit në dramën “Arturo Ui” të Bertold Brehtit, roli i sekretarit të Prefektit në dramën “Prefekti” e Besim Levonjës,rolin e Apostolit në dramën “Komunistët” e Ruzhdi Pulahës, rolin e Perikliut në komedinë “Pallati 176” .
Roli i tij më i fundit do të jetë në vitin 2009 në teledramën “Burgjet plot liria në derë”. I ndjeri Kristofori vuante nga një sëmundje e rëndë, ndërsa ndërroi jetë në orët e vona të mbrëmjes së djeshme. Varrimi do të bëhet nesër në Vuno, teksa stafi i Gazeta Reforma shpreh ngushëllime të sinqerta familjes së ikonës së komedisë “Pallati 176”.
