Autoriteti Rrugor Shqiptar ka njoftuar për situatën në akset Bogë-Theth dhe Hani i Hotit-Tamarë, pas reshjeve të dëborës që kanë vazhduar gjatë natës.
Sipas ARRSH, borëpastrueset kanë punuar intensivisht për pastrimin e rrugëve dhe shpërndarjen e kripës.
Qarkullimi i mjeteve vijon pa probleme, por autoritetet iu bëjnë apel drejtuesve të mjeteve për kujdes të shtuar, pasi rrugët janë të lagura dhe rekomandohet përdorimi i gomave dimërore dhe zinxhirëve, veçanërisht për udhëtimet në zona malore me prezencë dëbore.
“Gjatë natës ka pasur reshje dëbore në Bogë-Theth dhe Hani i Hotit Tamarë.
Mjetet borëpastruese kanë vijuar me punën në terren për pastrimin e rrugëve nga dëbora dhe shpërndarjen e kripës.
Qarkullimi kryhet pa probleme. Drejtuesit e mjeteve të kenë kujdes të shtuar gjatë drejtimit të mjetit për shkak të lagështisë në rrugë, të pajisen me goma dimërore dhe zinxhir kur udhëtojnë për në zonat malore me prezencë dëbore”, shkruan ARRSH.
