Në një konferencë për mediat nga rezidenca e SHBA-ve, ambasadorja amerikane Yuri Kim deklaroi se kanë një marrëveshje për Reformën Zgjedhore, ndërsa i bëri thirrje kreut të opozitës Lulzim Basha që ta pranojë.
Kim përgëzoi Partinë Socialiste në këtë proces, për të cilën tha se ka dhënë shumë, ndërsa theksoi se në marrëveshje janë përfshirë edhe rekomandime që nuk janë bërë nga OSBE-ODHIR.
Ndërkohë, që marrëveshja ende nuk është firmosur, pasi përfaqësuesit e opozitës nuk u paraqitën në takimin e fundit, ndërsa Kim ia ka pasuar ‘topin’ kryedemokratit Lulzim Basha për të dhënë “po” me gjithë çfarë është rënë dakord në tryezë.
Sipas ambasadorës, marrëveshja është dakordësuar nga të gjithë anëtarët e Këshillit Politik por pritet që një ‘ok’ edhe nga Basha, i cili sipas saj ka në dorë të ardhmen.
“Kemi pasur një ditë të gjatë. Dje jemi takuar për 9 orë. U takum sot për 9 orë të tjera dhe bëmë progres të jashtëzakonshëm. Sikurse e thashë në një negociatë që është kaq e rëndësishme për të ardhmen, çdo pale i kërkohet që të japë në mënyrë që Shqipëria të fitojë. Cdo palë dhe, gjithashtu çdo palë fitoi. Populli shqiptar mund të fitojë akoma më shumë. Secila palë dha por më duhet t’i jap merita të veçanta partisë në pushtet. Ne e bëmë të qartë si partia në pushtet ata kanë privilegjet e tyre dhe do të jepnin më shumë. Ata e bënë. E përgëzoj partinë në pushtet për atë që kanë bërë. Ne kemi atë që mund të jetë një marrëveshje shumë e mirë. Është një marrëveshje që do e vendosë Shqipërisë në mënyrë të patundur drejt integrimit. Përmban masa që janë trajtuar nga OSBE/ODIHR. Përmban disa hapa domethënëse që nuk janë rekomanduar nga ODHIR. Ka ardhur koha për opozitën, për PD, për mikun tim Luli Basha që të barazpeshpojnë të gjithë faktorët. Dhe të thonë po për popullin shqiptar. Dhe të thonë po për Shqipërinë në Evropë. Topi është në fushën tij e ardhmja është në duart e tij”, tha Yuri Kim.
Ndërkohë kryedemokrati Lulzim Basha aktualisht ndodhet në selinë blu bashkë me aleaten e tij, kryetaren e LSI-së, Monika Kryemadhi dhe me dy përfaqësuesit e opozitës në tryezë, Oerd Bylykbashi dhe Petrit Vasili.
Këta dy të fundit nuk u kthyen në rezidencën amerikanë pas pushimit 90 minutësh, ndryshe nga ç’bënë kolegët e tyre, Damian Gjiknuri dhe Rudina Hajdari.
