I dërguari nga Bashkimi Evropian për dialogun Kosovë-Serbi, Miroslav Lajçak, ka zhvilluar takime të ndara me përfaqësuesit e Kosovës, Besnik Bislimin dhe atë të Serbisë, Petar Petkoviç, për të diskutuar rreth tensioneve që janë krijuar prej ditësh në veri të Kosovës.
Bislimi ka njoftuar se është arritur një marrëveshje sa i përket targave.
“Kemi tentuar të detyrojmë Serbinë që ti largojë procedurat për qytetarët e Kosovës që të lëvizin drejt Serbisë. Dhe mendoj qe ky ka qenë rezultati i sotëm, mund të themi që është një marrëveshje.
Natyrisht që ne do të preferonim që mos të ketë asnjë barrierë dhe këto dy shtete sot të njohin në tërësi tabelat e vendeve tjera, ky do jetë edhe objektivi kryesor i grupit punues të cilin do ta themelojmë dhe i cili do të fillojë të takohet që nga data 21 tetor.
Ne kemi dakordim për të gjitha pikat. E vetmja pikë ku pala serbe ende nuk e ka dhënë pëlqimin ka të bëjë me veturat që kanë targa (KM – për Mitrovicën e Veriut), për të cilat ata mendojnë që nuk do të duhet të aplikoheshin stikersat, dhe mendoj që kjo është absurde për arsye se ato janë tabela ilegale”, u shpreh Bislimi në një lidhje direkte për RTK.
Kujtojmë këtu se tensionet në veri të Kosovës kanë filluar që nga hyrja në fuqi e vendimit për reciprocitetin e targave. Menjëherë pas këtij vendimi shumë qytetarë serbë filluan protestat në kufi duke dalë kështu në kundërshtim me vendimin dhe bën të mundur bllokimin e rrugës me mjete të rënda.
