Agjencia e Mbikëqyrjes Policore ka realizuar një operacion të gjerë, duke ndaluar dy punonjës policie, një doganier dhe dy shtetas të tjerë, të dyshuar për shpërdorim detyre, kontrabandë dhe falsifikim dokumentesh.
Operacioni është mbështetur nga hetimet disa mujore dhe ka çuar në shpalljen në kërkim të një tjetër punonjësi policie.
Në përputhje me urdhërat e ndalimit të lëshuara nga Prokuroria e Gjirokastrës, janë ndaluar:
• Kryekomisar Alfred Kondi, Shef i Sektorit të Krimit të Organizuar në Drejtorinë e Policisë të Vlorës dhe Gjirokastrës, i dyshuar për “Shpërdorim të detyrës” dhe “Shpërdorim të autoritetit policor” në bashkëpunim.
• Nënkomisar Xhevit Dine, Specialist në Seksionin e Inteligjencës dhe Arkivës Kriminale, i dyshuar gjithashtu për “Shpërdorim të detyrës” në bashkëpunim.
• Inspektor Feim Onjea, pjesë e forcës speciale Shqiponja, i dyshuar për “Shpërdorim të detyrës” dhe “Shpërdorim të autoritetit policor” në bashkëpunim. Ai është shpallur në kërkim.
Gjithashtu, janë ndaluar:
• Bledar Mustafaraj, doganier në degën doganore të Kakavijës, i dyshuar për “Falsifikim dokumentesh” dhe “Kontrabandë nga punonjës të lidhur me veprimtarinë doganore”.
• Ili Muho dhe Kleodor Kazo, të dyshuar për “Kontrabandë me mallra të tjera” dhe “Falsifikim vulash, stampash dhe formularësh” kryer në bashkëpunim.
Hetimet zbuluan se të dyshuarit ishin të përfshirë në aktivitetet kriminale të trafikimit të emigrantëve të paligjshëm dhe kontrabandës së mallrave, përfitime të paligjshme dhe organizimin e lojërave të fatit.
Ata kanë përdorur pozitat dhe detyrat e tyre për të lejuar këto aktivitete ilegale.
Si provë materiale, janë sekuestruar një automjet tip ML dhe katër aparate celular, të cilat do të përdoren për hetimin e mëtejshëm.
