Pas 7 ditësh nga vrasja e Hekuran Billës është arrestuar sot, në Mal të Zi Viktor Marku.
Viktor Marku është arrestuar në Tuz të Malit të Zi dhe ishte i shpallur në kërkim për vrasjen e Billës, i vrarë me 12 qershor në zonën e Komunës së Parisit, në Tiranë.
Marku është vëllai i Prel Markut, i vrarë ky në vitin 2002 nga Hekuran Billa në Angli.
Arrestimi i Viktor Markut është bërë nga autoritetet malazeze në bashkëpunim me policinë shqiptare.
Autoritetet malazeze pritet të sjellin Markun në Shqipëri nëpërmjet pikës kufitare të Hanit të Hotit.
Arrestimi i Viktor Markut vjen një ditë pas arrestimit të nipit të tij, Sebastian Mali dhe vëllait të tij i cili u shoqërua natën që ndodhi atentati në Shkodër.
Ditën e sotme janë arrestuar edhe dy persona të tjerë të cilët mësohet se janë nga rrethi i familjes Marku dhe mendohet se janë bashkëpunëtorë në atentat.
Hekuran Billa, 40 vjeç dhe me precedentë të mëparshëm penalë, është ekzekutuar mbrëmje e 12 qershorit me një armë zjarri me silenciator në një zonë të populluar te Komuna e Parisit në kryeqytet, rreth orës 22:00.
Hekuran Billa, është dënuar për vrasje të Prel Marku, 22 vjeç, në Park Royal më 14 tetor 2008, kur ishte 28 vjeç.
Po ashtu, ai ka qenë i përfshirë në bandat shqiptare të cilat operonin në fushën e trafikut të qenieve njerëzore, dhe në prostitucion dhe sipas mediave të huaja, rivali i Billës ishte Petrit Brahoj, 45 vjeç.
Billa u ekstradua nga Anglia në Shqipëri për të vuajtur dënimin me burgim të përjetshëm, për vrasje dhe një vit më parë është liruar nga burgu i Fushë-Krujës, pasi nga autoritetet është konsideruar se dënimi i tij prej 35 vitesh burg, është shlyer.
