Një punonjës i rolit bazë në Institucionin e Ekzekutimit të Vendimeve Penale Fushë-Krujë, me inicialet H. Ç., është arrestuar në flagrancë pasi tentoi të fuste sende të ndaluara në ambientet e burgut.
Gjatë ndërrimit të shërbimeve, ai hodhi një qese të zezë me peshë rreth 6 kg mbi një tarracë të regjimit të jashtëm, me synimin për t’i futur më pas në regjimin e brendshëm.
Pas konstatimit të ngjarjes, zona u rrethua dhe autoritetet nisën hetimet.
Brenda pakove u gjetën:
• 22 celularë me aksesorët përkatës (karikues, kufje)
• 3 doza kokainë
• 30 koka përshtatëse karikuesi nga Android në iPhone
Materialet u gjetën pranë depos së armatimit dhe depozitës së gazit, nën Vendrojën Nr.1.
H. Ç. u arrestua për veprat penale “Futja e sendeve të ndaluara në bashkëpunim” dhe “Prodhimi dhe shitja e lëndëve narkotike në bashkëpunim”.
Autoritetet vijojnë hetimet për të identifikuar bashkëpunëtorë të tjerë të mundshëm.
