Ngjarja e rëndë ka ndodhur në fshatin “Shëngjin i Vogël”, ku 81-vjeçari Xhemal Meta u gjet pa shenja jete në banesën e tij.
Fillimisht, ngjarja u raportua si aksidentale, por ekspertiza mjeko-ligjore zbuloi se i moshuari ishte goditur me sende të forta në pjesën e pasme të kokës.
Burime policore njoftuan se autori i arrestuar është shtetasi Isuf Hasa, ndërsa hetimet vijojnë për të zbuluar nëse ka pasur bashkëpunëtorë dhe për të sqaruar të gjitha rrethanat e krimit. Motivi i ngjarjes ende mbetet i panjohur.
Djali i viktimës deklaroi se familja e tyre nuk ka pasur asnjë konflikt me persona të tjerë dhe për këtë arsye e përjashtoi mundësinë e ndonjë hakmarrjeje.
Sipas tij, ata e gjetën të moshuarin të shtrirë në hyrje të banesës, të gjakosur, dhe fillimisht menduan se ishte një aksident. Ai shtoi se shtëpia nuk ishte grabitur, por mungonte vetëm kuleta personale e viktimës.
“Nuk kemi pasur gjë për të vjedhur. Vetëm kuleta e babait mungon. Nuk kam dyshime për askënd, pasi nuk kemi pasur konflikte. Kjo është një zonë e qetë, nuk ka ndodhur kurrë diçka e tillë më parë,” tha i biri.
Policia ka nisur hetimet për të zbardhur plotësisht ngjarjen dhe motivet që çuan në vrasjen e të moshuarit.
