Një ngjarje tronditëse ka ndodhur pasditen e së mërkurës në fshatin Xibër-Murrizë të bashkisë Klos, ku një 65-vjeçar u gjet i masakruar pranë banesës së tij.
Viktima, Selim Velsula, dyshohet se është goditur me thikë disa herë nga kushëriri i tij, 28-vjeçari Hazbi Velsula, i cili u arrestua disa orë më vonë në zonën e Alliasit në Tiranë.
Sipas burimeve zyrtare, autori i dyshuar e ka njoftuar të motrën pas krimit, duke i thënë: “E bëra vrasjen me mjet prerës.”
Motra reagoi menjëherë, duke informuar policinë, e cila arriti ta lokalizojë dhe ta vërë në pranga.
Nga këqyrja paraprake e trupit të viktimës janë konstatuar plagë të shumta të shkaktuara me thikë, çka përforcon dyshimet për një sulm të qëllimshëm.
Trupi i pajetë është dërguar në Institutin e Mjekësisë Ligjore për autopsi, ndërsa grupi hetimor, nën drejtimin e Prokurorisë së Rrethit Mat, vijon hetimet për të zbardhur rrethanat dhe motivet e kësaj vrasjeje.
Selim Velsula jetonte prej vitesh në fshat me bashkëshorten dhe njihej si njeri i qetë, i përkushtuar ndaj punës në bujqësi e blegtori.
Rreth orës 16:00 të pasdites, ai kishte nxjerrë bagëtinë në kullotat mbi fshat dhe ishte kthyer në shtëpi për të marrë një shishe me ujë. Gjatë kthimit drejt zonës ku ndodheshin bagëtitë, ai është thirrur nga kushëriri i tij Hazbi, i cili i kishte kërkuar të afroheshin për të folur.
Në ato momente, dyshohet se autori e ka sulmuar me thikë, duke i shkaktuar plagë vdekjeprurëse.
I plagosur rëndë, 65-vjeçari tentoi të kthehej drejt banesës, por u rrëzua në rrugicën e fshatit. Ai u gjet pa shenja jete nga një banor, i cili po shkonte të merrte ujë për vaditje dhe më pas njoftoi familjarët dhe fqinjët.
Hazbi Velsula, i cili jetonte prej kohësh në zonat rurale të Tiranës, ishte rikthyer së fundmi në pronat familjare në Xibër.
Sipas burimeve të afërta me hetimin, ai dyshohet se vuan nga probleme të shëndetit mendor, por kjo pritet të verifikohet përmes ekspertizës mjekoligjore.
Ngjarja ka tronditur komunitetin lokal, ndërsa policia dhe prokuroria janë në pritje të rezultateve të autopsisë dhe ekspertizës psikike për të përcaktuar më tej vijimësinë ligjore të çështjes.
