Një 34-vjeçar është vënë në pranga pasi akuzohet për armëmbajtje pa leje. Sipas njoftimit të policisë, i riu me inicialet I.A., është kapur në Rrugën e Kavajës teksa kalonte me mjetin e tij. Ekipi i “Shqiponjave” e ka ndaluar për kontroll dhe brenda mjetit të tij ka gjetur armën e zjarrit, municion luftarak e dy thika. Armët u sekuestruan, ndërsa 34-vjeçari është vënë në pranga.
Njoftimi i policisë Tiranë
Finalizohet operacioni policor i koduar “Monday”, për goditjen e veprimtarisë kriminale në fushën e armëmbajtjes pa leje. Operacioni, i zhvilluar nga Komisariati i Policisë Nr. 3 në bashkëpunim me Forcën e Posaçme “Shqiponja”. Qarkullonte me armë zjarri me vete, vihet në pranga 34-vjeçari. Sekuestrohen një armë zjarri pistoletë, një krëhër me municion luftarak dhe dy mjete presëre (thika). Shërbimet e Komisariatit të Policisë Nr. 3, në bashkëpunim me shërbimet e Forcës së Posaçme “Shqiponja”, në vijim të punës për parandalimin dhe goditjen e veprimtarisë kriminale në fushën e armëmbajtjes pa leje, bazuar dhe në informacionet e marra në rrugë operative, se një shtetas po lëvizte me armë zjarri në automjet, në Rrugën e Kavajës, kanë organizuar punën dhe kanë finalizuar operacionin policor të koduar “Monday”.
Në kuadër të këtij operacioni u bë arrestimi në flagrancë i shtetasit: I. K., 34 vjeç, banues në Tiranë, për veprat penale “Mbajtja pa leje dhe prodhimi i armëve, armëve shpërthyese dhe i municionit” dhe “Prodhimi, mbajtja, blerja apo shitja pa leje e armëve të ftohta”. Gjatë kontrollit të mjetit që ky shtetas drejtonte, shërbimet e Policisë gjetën dhe sekuestruan në cilësinë e provës materiale, një armë zjarri pistoletë, një krëhër me municion luftarak dhe dy mjete prerëse (thika). Materialet procedurale i kaluan Prokurorisë pranë Gjykatës së Shkallës së Parë Tiranë, për veprime të mëtejshme.
