Një 24-vjeçar shqiptar është arrestuar nga policia italiane, pasi u kap me lëndë narkotike. Lorenc Palaj u arrestua pas një ndjekjeje me makinë e më pas policia e ka ndjekur në këmbë.
Palaj në fillim nuk i është bindur thirrjes së policisë, ku ai po drejtonte një mjet. Patrulla e policisë e ka ndjekur derisa e rrethoi, por 24-vjeçari ka dalë nga makina ku ka nisur edhe të vrapojë drejt qendrës së Albisola-s.
Fillimisht ai kaloi disa rrugë dhe ngjiti një mur. Këtu pësoi edhe një dëmtim në kavilje.
Ndërkohë agjentët e policisë e ndiqnin këmba-këmbës 24-vjeçarin. Në përpjekje për ta ndaluar, policët qëlluan të paktën gjashtë herë me armë zjarri në ajër. Në pak minuta, u ndalua dhe u vu në pranga.
Pas kontrollit të makinës së të riut, policia gjeti 31 kilogramë marijuanë, të cilat u sekuestruan. Ai u dërgua fillimisht në komisariat për të dhënë shpjegimet për ngjarjen dhe më pas u dërgua në burg ku pritet të dalë para gjykatës.
