Policia ka arrestuar një 19-vjeçar pakistanez, i cili po transportonte me automjet 5 emigrantë nga vendet e treta drejt Kakavijës, me qëllim kalimin ilegal të kufirit me Greqinë.
Gjatë operacionit, i koduar “Turn 1”, autoritetet kanë tentuar të ndalojnë automjetin në aksin rrugor “Tepelenë-Memaliaj”, por drejtuesi nuk ka pranuar shenjën e ndalimit dhe ka vazhduar lëvizjen me shpejtësi për disa minuta, duke braktisur më pas automjetin.
Automjeti, në të cilin transportoheshin emigrantët, u sekuestrua si provë materiale, ndërsa drejtuesi i automjetit, shtetasi pakistanez A. A., 19 vjeç, u arrestua.
Ai është akuzuar për veprën penale “Ndihma për kalim të paligjshëm të kufijve”.
Materialet procedurale janë dorëzuar në Prokurorinë e Gjirokastrës për hetime të mëtejshme.
