Në kuadër të operacionit ndërkombëtar kundër krimit të organizuar, i cili u zhvillua në pjesën e Evropës Juglindore, Europoli dhe policia ka arrestuar 166 persona.
Mësohet se pjesë e këtij operacioni kanë qenë 34 vende, mes të cilëve edhe Shqipëria. Operacioni katër-ditor i mbështetur nga Europol kishte për qëllim trajtimin e emigracionit të paligjshëm dhe trafikimin e armëve të zjarrit dhe drogës.
Gjatë këtij operacioni, janë arrestuar 17 persona për trafik të armëve, 73 për kontrabantë të emigrantëve të paligjshëm, 37 për trafik droge, 7 për trafik të armëve të paligjshme dhe trafik droge, 12 për dokumente të rreme, një person i shpallur në kërkim ndërkombëtar për krime të ndryshme ndërsa 19 të tjerë janë arrestuar për krime të ndryshme që nuk lidhen me operacionin JAD. Gjithashtu janë sekuestruar 51 armë të llojeve të ndryshme dhe 47 kilogramë të një shumëllojshmërie droge.
Në kuadër të këtij operacioni shefi i Qendrës së Krimit të Organizuar të Europolit, Jari Liukku, tha se kriminelët nga rajoni i Evropës Juglindore po zgjerojnë gjithnjë e më shumë rrjetin e tyre të ndikimit, ndaj është e rëndësishme një punë e mirorganizuar për ta parandaluar një gjë të tillë.
“Kriminelët nga rajoni i Evropës Juglindore po zgjerojnë gjithnjë e më shumë rrjetin e tyre të ndikimit. Europol është i përkushtuar të punojë ngushtë me këtë rajon dhe të mbështesë një qasje ndërkombëtare të koordinuar dhe mbështetëse reciproke për të luftuar krimin e rëndë dhe të organizuar. Ky operacion është një sukses i jashtëzakonshëm dhe ilustron këtë bashkëpunim të fortë për zbatimin e ligjit”,ka thënë kreu i Europolit.
