Mesditën e sotme, me urdhër të SPAK, u arrestua ish-Presidenti i Republikës, Ilir Meta. Ky i fundit u arrestua te Kthesa e Kamzës nga forcat operacionale dhe ato të BKH-së, ndërsa pamjet e publikuara nga “Gazeta Reforma”, tregojnë momentet kur Presidenti i PL-së u nxorr forcërisht nga makina nga agjentët e policisë dhe ato të BKH.
Nuk dihet nëse ka pasur një përplasje mes Metës dhe policëve që mbanin maska në fytyrë që çoi në reagimin e fortë të tyre, për të nxjerrë forcërisht nga automjeti ish-Preisdentin.
Tedi Blushi ngriti dyshimet se në momentin e arrestimit të Metës nuk kanë qenë të pranishme efektivët e Gardës që e ruajnë atë për shkak të funksionit që ka pasur si President i Republikës.
Si u arrestua Ilir Meta?
Sipas informacioneve, nga momenti kur Ilir Meta ka hyrë në territorin shqiptar nga Kosova, dy automjete të BKH dhe agjentëve të policisë e kanë ndjekur automjetin ku ndodhej ish-Presidenti deri në momentin kur është vendosur ndërhyrja për ta arrestuar.
Referuar burimeve nga policia, thuhet se gjatë momenteve që ish-Presidenti ka qenë në ambientet e Drejtorisë së Policisë së Tiranës, ka pasur një përplasje të fortë mes tij dhe agjentëve të BKH-së. Gjithmonë duke iu referuar burimeve, thuhet se Meta ka hedhur akuza të forta drejt SPAK dhe ambasadës së SHBA në Tiranë.
Ish-Presidenti Meta ka qëndruar në ambientet e Drejtorisë së Policisë së Tiranës për rreth 90 minuta dhe më pas është shoqëruar në atë që njihet si blloku i sigurisë.
