Për arratisjen e Rilian Lalës nga Komisariati nr.1 kanë nisur hetime nga SHÇBA. Dy efektivët e Policisë që e ruanin janë pezulluar nga detyra, pas arratisjes dje të 30 vjeçarit Lala.
Ai u arrestua për “Armëmbajtje pa leje” më datë 2 janar, por u arratis mëngjesin e djeshëm në orën 08.00, teksa shoqërohej në një ambient tjetër të Komisariatit nr.1 për të dhënë shenjat e gishtave.
Shërbimi për Çështjet e Brendshme dhe Ankesat në Policinë e Shtetit (SHÇBA), ka nisur procedimin penal për dy efektivët e këtij Komisariati, dhe i pa pezulluar nga detyra deri në përfundim të hetimeve.
30 vjeçari do të dërgohej në Gjykatë për dhënien e masës së sigurisë. Gjyqtari dha për Rilian Lalën masën e sigurisë “Arrest me burg”, në mungesë.
Ngjarja
Mësohet se Lala i ka ikur Policisë në momentin kur do t’i merreshin shenjat e gishtave. I shoqëruar vetëm nga një polic, Rilian Lala ka pritur derisa i janë hequr prangat dhe ia ka “mbathur” nga Komisariati nr.1 në Tiranë, jo shumë larg vendit ku u arrestua.
30 vjeçari u arrestua dy ditë më parë, më datë 2 janar nga forcat “Shigjeta” te “Ali Demi”, pasi lëvizte me pistoletë me vete. Policia menjëherë pas marrjes së informacioneve se një person qarkullonte me armë zjarri me vete, është nisur drejt “Ali Demit”.
Aty efektivët e Shigjetave kanë parë të riun Rilian Lala, i cili ka hedhur në tokë pistoletën që mbante me vete dhe “ia ka futur vrapit”. Në ndjekje e sipër, ai është arrestuar dhe është dërguar në Komisariatin nr.1 në Tiranë.
