Në i arrestuar arratiset nga Komisariati nr.1 në kryeqytet. Rigers Lala do të dilte sot para Gjykatës për tu njohur me masën e sigurisë. Ai u ndalua nga policia pasi u kap me një pistoletë pa leje
30 vjeçari Lala u arrestua dy ditë më parë, më datë 2 janar te “Ali Demi”, pasi lëvizte me armë zjarri me vete. Policia menjëherë pas marrjes së informacioneve se një person qarkullonte me armë zjarri me vete, është nisur drejt “Ali Demit”.
Aty efektivët kanë parë të riun Rigers Lala, i cili ka hedhur në tokë pistoletën që mbante me vete dhe “ia ka futur vrapit”. Në ndjekje sipër, ai është arrestuar dhe është dërguar në Komisariatin nr.1 në Tiranë. Sot, 30 vjeçari do të dilte para Gjykatës për t’u njohur me masën e sigurisë.
Njoftimi i Policisë së Tiranës, 2 janar 2020
Qarkullonte me armë zjarri me vete, por falë dhe bashkëpunimit me qytetarët, Policia lokalizon dhe vë në pranga 30-vjeçarin.
Sekuestrohet në cilësinë e provës materiale një armë zjarri pistoletë.
Si rezultat i rritjes së besimit të qytetarëve tek Policia, është marrë informacion se një i ri po qarkullonte me armë zjarri në zonën e Ali Demit.
Menjeherë u organizuan shërbimet e Policisë për lokalizimin dhe kapjen e personit.
Si rezultat i reagimit të menjëhershëm , shërbimet e Komisariatit të Policisë Nr.1, në bashkëpunim me Forcën e Posaçme “Shigjetat”, bënë të mundur që në lagjen “Ali Demi” të lokalizonin personin e dyshuar, i cili sapo ka parë shërbimet e Policisë ka hedhur armën e zjarrit në tokë dhe ka tentuar të largohet me vrap, por gjatë ndjekjes është kapur dhe prangosur nga shërbimet e Policisë.
Në përfundim të veprimeve të para hetimore u bë arrestimi në flagrancë i shtetasit R.L., 30 vjeç, dhe materialet do ti kalojnë Prokurorisë së Rrethit Gjyqësor Tiranë, për veprime të mëtejshme.
/Gazetareforma.com/
