Këtë të shtunën pritet lirimi i tre pengjeve izraelitë nga Hamasi, në kuadër të një marrëveshjeje shkëmbimi me Izraelin.
Alexander Troufanov, Yair Horn dhe Sagui Dekel-Chen janë emrat e konfirmuar nga organizata palestineze, e cila është cilësuar si terroriste nga SHBA dhe BE.
Në këmbim, Izraeli do të lirojë 369 të burgosur palestinezë, përfshirë 36 të dënuar me burgim të përjetshëm dhe 333 të tjerë nga Rripi i Gazës, të cilët u arrestuan pas 7 tetorit pa akuza zyrtare, sipas Zyrës për Media të të Burgosurve Palestinezë.
Në fillim të javës, Hamasi refuzoi të lironte pengje, duke akuzuar Izraelin për shkeljen e marrëveshjes, ndërsa Tel Avivi kërcënoi me rifillimin e sulmeve nëse pengjet nuk liroheshin.
Deri më tani, si pjesë e armëpushimit, Hamasi ka liruar 16 izraelitë dhe pesë tajlandezë, ndërsa Izraeli ka liruar 766 të burgosur palestinezë, sipas të dhënave të Kryqit të Kuq.
