Argjentina ka shpallur shtatë ditë zie kombëtare pas ndarjes nga jeta të Papa Françeskut, i lindur në kryeqytetin Buenos Aires.
Lajmi u bë i ditur nga qeveria përmes një postimi në rrjetin social X, ku shprehet keqardhja e thellë për humbjen e Shenjtërisë së Tij dhe ngushëllimet drejtuar familjes Bergoglio.
Zëdhënësi i qeverisë, Manuel Adorni, bëri publike vendimin për shpalljen e zisë kombëtare, ndërsa presidenti Javier Milei reagoi me një mesazh në rrjetet sociale:
“Me pikëllim të madh mësova këtë mëngjes për ndarjen nga jeta të Papa Françeskut, Jorge Bergoglio. Tani ai prehet në paqe. Pavarësisht dallimeve tona që sot duken të parëndësishme ka qenë një nder i madh ta njihja dhe të vlerësoja mirësinë e mençurinë e tij.”
Marrëdhënia mes Papa Françeskut dhe presidentit aktual të Argjentinës, Javier Milei, ka qenë e tendosur në të kaluarën. Para se të zgjidhej president, Milei e kishte cilësuar Papën si një “budalla” dhe e kishte akuzuar për mbështetje ndaj ideve komuniste.
Megjithatë, në shkurt të vitit të kaluar, Papa Françesku e priti në Vatikan, ku të dy patën një takim që u përshkrua si “i përzemërt”.
Milei gjithashtu e ftoi Atin e Shenjtë të vizitonte Argjentinën, por Papa ndonëse ish-kryepeshkop i Buenos Airesit nuk u rikthye në atdheun e tij që prej zgjedhjes në krye të Kishës Katolike.
