Ditën e sotme në “Pallatin e Kongreseve” u mbajt ceremonia për t’i dhënë lamtumirën e fundit, nënkomisarit i cili mbeti i vrarë në Ishull Lezhë ditën e djeshme. Në ceremoninë e lamtumirës kanë marrë pjesë edhe zyrtarë të lartë.
Ardi Veliu, kreu i Policisë së Shtetit ka dhënë mesazhin e tij në ceremonin e lamtumirës së nënkomisarit. Veliu ka thënë se momenti i ndarjes nga Saimiri është shumë i vështirë dhe duke i shprehur ngushëllime familjes së tij ai ka thënë se, ata nuk do të jenë kurrë vetëm.
“Këtë pikëllim e kanë shprehur edhe në qindra mesazhe e komente nga dje e sot të dërguara në adresën e Policisë së Shtetit. Të nderuar familjarë të nënkomisar Saimir Hoxhës, ju nuk do të jeni vetëm asnjëherë, jeni pjesë e familjes së madhe, që është Policia e Shtetit, dhe do ju gjendemi përherë pranë. Ky moment i ndarjes nga Saimiri është shumë i vështirë jo vetëm për familjen, por për gjithë policinë, por edhe burim force për të vijuar luftën kundër krimit. Përulemi para trupit të heroit, duke premtuar se nuk na step asnjë moment frike. Çdo vështirësi vetëm na qartëson rrugën, ku të ecim për një shoqëri më të sigurt e më të mirë. U prehsh në paqe miku ynë, të paharruara do të jenë përjetë kujtimi dhe vepra jote”, tha Ardi Veliu.
