Ministria e Brendshme duket se do të bëjë disa ndryshime rrënjësore tashmë me drejtimin një prej institucioneve më të rëndësishme, Policisë së Shtetit. Nga burime të Politiko.al, mësohet se shumë shpejt Ardi Veliu i cili aktualisht mban postin e drejtorit të Policisë së Shtetit, do të zëvendësohet nga ish-gjenerali, Shpëtim Spahiu.
Ka qenë vet ministri Lleshaj që e ka marrë këtë vendim, i cili shumë shpejt pritet që të bëhet zyrtar.
Spahiu ka një karrierë të gjatë në ushtri ku edhe ka qenë komandant i Shtabit të Përgjithshëm të Ushtrisë dhe ka drejtuar në të gjitha nivelet. Mirëpo hendek ka hasur vetëm në vitin 2008, ku është akuzuar për “shpërdorim detyre” në tragjedinë e Gërdecit, e cila i mori jetën 26 personave.
Ka qenë vet prokuroria e cila ka kërkuar 8 vite burg për ushtarakun dhe 5 vite ndalim të ushtrimit të profesionit në Forcat e Armatosura, kërkesë e cila nuk u mor parasysh.
Pas largimit nga ushtria, Shpëtim Spahiu u emërua nga Qeveria e Edi Ramës në krye të drejtorisë së shërbimit të trupit diplomatik. Në vitin 2017-të, në media u raportua se Spahiu kishte firmosur shkarkimin nga detyra për 33 specialistë të kësaj drejtorie, me justifikimin e mungesës së kushteve financiare.
