Kryeministri Edi Rama ka folur në një intervistë për CNN, kur është dnalur tek ardhja e qytetarëve afganë në vendin tonë. Për gazetaren, Isa Soares, Rama ka thënë se Shqipëria ka bërë çdo gjë për personat që kanë mbërritur në vend dhe do të bëjë të njëjtën për ata që do të vijnë. Megjithatë, ai shtoi se çdo ditë del diçka që thyen shpresat, pasi edhe talebanët tashmë e kanë ndryshuar fjalën duke thënë se do të lejojnë vetëm njerëzit me pasaporta
“Po dëgjojmë edhe ne të njëjtën gjë. Prej më shumë se 1 jave nisëm të bashkëpunonim me miqtë tanë që janë angazhuar në këtë operacion dhe çdo ditë del diçka që thyen shpresat. Nuk mund të them më shumë për këtë .Ndoshta është një lojë e talebanëve. Nuk mund të spekuloj për këtë. Mund të them se kemi bërë për këta njerëz ato që kemi bërë për ata që kanë arritur dhe presim që të vijnë. Ky aeroport me sa duket është problematik. Nuk do të habitesha që kjo të ishte një lojë e talebanëve. Lajmi i fundit që mora është që tashmë e kanë ndryshuar fjalën duke thënë se do të lejojnë vetëm njerëzit me pasaporta”, ka thënë Rama.
Kryeministri mohoi përfshirjen në bisedime me talebanët dhe tha se çdo gjë që po bëhet është për të qenë në kontakt të ngushtë me miqtë në SHBA që janë të angazhuar në këtë nismë njerëzore.
“Jo, ne nuk kemi hyrë në asnjë lloj bisede me talebanët dhe shpresojmë se nuk do të hyjmë. Unë besoj që kjo është qeveria amerikane. Ajo që po bëjmë është të jemi në kontakt me miqtë në SHBA që janë të angazhuar në këtë nismë njerëzore. Është shqetësuese që qytetarët amerikanë nuk mund të dalin nga aeroporti”, ka thënë Rama.
