Intervista e pak ditëve më parë nga ish numri dy i qeverisë, Arben Ahmetaj pritej të trondiste zyrat e ish-kolegëve të tij, pas akuzave të rënda që ai bëri. Megjithatë, SPAK kërkon ende kohë për të nisur hetimet për denoncimet me vonesë të tij, i cili ndër të tjera ngriti akuza të rënda ndaj kreut të qeverisë dhe Veliajt për “Inceneratorët”.
Siç shprehet edhe gazetari Klodian Tomorri, “mos duhet që Rama të dalë me thes në krahë që SPAK-u të shohë provat?”
“Nuk e kuptoj se cilat janë provat që duhet të dalin, mungon që vetëm Rama të dalë me thes në krahë dhe të thotë ja provat. Kur ai thotë që kryeministri ka një kompani e cila grabit paratë e taksave të qytetarëve është një akuzë e rëndë për më tepër thuhet që ai ka qenë dhe vetë prezent. Këtu duhet një përgjigje pasi është vënë në pikëpyetje interesi i kryeministrit dhe janë organet e drejtësisë që duhet të japin një përgjigje”, shprehet ai.
Nga ana tjetër gazetarja Klodiana Lala shprehet se Ahmetaj mund t’i japë fund karrierës politike të kryeministrit Edi Rama dhe kryetarit të Bashkisë së Tiranës, Erion Veliaj.
“Arben Ahmetaj është njeriu që sot për sot është i vetmi që mund t’i japë fund karrierës politike jo vetëm të kryeministrit Edi Rama por edhe kryetarit të Bashkisë Tiranë dhe shumë figurave të larta politike në PS. Do kisha dashur si gazetare që Arben Ahmetaj të fliste vetëm një herë dhe të ishte shterues i qartë dhe konkret. Ka dhënë shumë indicie të cilat kanë nevojë për t’u hetuar dhe përkthyer në dosje hetimore”, shprehet ajo.
Megjithatë denoncimi i tij për afera të cilat tashmë dihen është tepër vonë. E vërteta ka efekt në kohën e duhur dhe këto denoncime fillojnë e humbim vlerën kur vonohen dhe bëhen nga njerëz që janë ose të burgosur ose në kërkim. Nga ana tjetër SPAK-ut i shtohet presioni ashtu si kurrë më parë me gjithë këto arrestime e hetime e shpallje në kërkim.
