Afati për aplikimet në garën për postin e drejtorit të Byrosë Kombëtare të Hetimit është i hapur edhe sot deri në orën 16:00, pasi u shty nga e premtja për shkak të festës zyrtare të Kurban Bajramit.
Në përfundim të afatit, pritet që SPAK të publikojë një njoftim zyrtar ku do të bëhen publik emrat e kandidatëve që kanë dorëzuar dokumentacionin për të garuar për postin e kreut të BKH-së, që ka një mandat 5-vjeçar.
Deri tani janë zbuluar dy kandidatura: ish-drejtori i Përgjithshëm i Policisë së Shtetit, Gledis Nano, dhe Joni Keta, aktualisht zëvendësdrejtor në BKH.
Gara do të zhvillohet në ambientet e SPAK dhe procesi i përzgjedhjes do të drejtohet nga një komision i përbërë nga tre prokurorë: Altin Dumani, Altin Kraja dhe Behar Dibra.
Drejtoresha aktuale, Aida Hajnaj, e cila e përfundon mandatin më 31 gusht, nuk ka dorëzuar dokumentacionin për një mandat të dytë, ndonëse e kishte këtë të drejtë.
Procesi i përzgjedhjes së drejtorit të ri do të kalojë në shtatë faza: test arsyetimi logjik, kontroll mjekësor, test fizik, ese me shkrim, intervistë me gojë, verifikim figure dhe pasurie, si dhe test poligrafik.
