Gjykata e Posaçme e Apelit për Korrupsionin dhe Krimin e Organizuar ka rrëzuar kërkesën e Erion Veliajt për ndryshimin e masës së sigurisë, duke lënë në fuqi “arrestin në burg” për kryebashkiakun e Tiranës.
Vendimi u mor sot, më 24.02.2026, nga trupi gjykues monokratik i përbërë nga gjyqtarja Nertina Kosova, në lidhje me çështjen penale nr. 68 akti, datë 17.02.2026 regjistrimi. Ankuesi E.V kishte kundërshtuar vendimin nr. 118, datë 01.02.2026, të Gjykatës së Posaçme të Shkallës së Parë për Korrupsionin dhe Krimin e Organizuar, duke kërkuar zëvendësimin e masës “Arrest në burg”, parashikuar nga neni 238 i Kodit të Procedurës Penale, me një masë më të butë si “Garancia pasurore”, sipas nenit 236, ose “Detyrimi për t’u paraqitur në policinë gjyqësore”, sipas nenit 234 të këtij Kodi.
Në njoftimin zyrtar thuhet: “Miratimin e vendimit nr. 118, datë 01.02.2026 të Gjykatës së Posaçme të Shkallës së Parë për Korrupsionin dhe Krimin e Organizuar. U shpall në Tiranë, sot më datë 24.02.2026”.
Seanca në Apelin e GJKKO u zhvillua me dyer të mbyllura dhe u drejtua nga gjyqtarja Nertina Kosova. Veliaj kërkoi të ishte vetë i pranishëm në seancë dhe refuzoi të përfaqësohej nga avokatët e tij.
Ai iu drejtua Apelit të Posaçëm pasi gjyqtarja e hetimit, Etleva Deda, kishte refuzuar më herët kërkesën për ndryshimin e masës së sigurisë.
Javën e kaluar, kryebashkiaku i Tiranës dhe 29 të pandehur të tjerë kaluan për gjykim themeli, pas afro pesë muajsh seancë paraprake. Vendimi i sotëm i Apelit lë në fuqi masën e sigurisë deri në vijimin e procesit në themel.
