Gjykata e Apelit të Posaçëm ka rrëzuar kërkesën e ish-drejtorit të Policisë së Vlorës, Jaeld Çela i cili kërkoi një masë më të butë sigurie. Çela ankimoi vendimin e Shkallës së Parë, e cila refuzoi lirimin e tij nga qelia. Ai kërkoi zbutje të masës së sigurisë “arrest me burg” me arsyetimin e tejkalimin të afatit të shqyrtimit të çështjes së tij në Gjykatën e Apelit. Ish-drejtori i Policisë pretendon se sipas ligjit, ai nuk mund të mbahet në burg, pasi nga dita e vendimit nga Apeli ka kaluar me shumë se një vit, ndërsa theksoi se për këtë shkak afatet e paraburgimit e kanë humbur efektin. Dosja penale ndodhet në Gjykatën e Larte dhe pret për t’u shqyrtuar.
Ish-drejtori i Policisë akuzohet për “shpërdorimit të detyrës” dhe bashkëpunim me grupin e Moisi Habilajt. Kujtojmë se Çela po vuan një dënim me 3 vjet e 4 muaj burg dhënë nga Gjykata për Krimet e Rënda për akuzën e “shpërdorimit të detyrës”. Ai ishte i bashkëpandehur në të njëjtin proces me ish-ministrin e Brendshëm, Saimir Tahiri. Sjellim në vëmendje se ish-kreu i Policisë së Vlorës u vetëdorëzua në polici në maj të 2020-ës, pas dy vitesh në arrati, ndërsa akuzohet për veprat penale “Kultivim i bimëve narkotike”, “Trafikim i bimëve narkotike” dhe “Grup i strukturuar kriminal”. Jaeld Çela është dënuar me 3.4 vite burgim për shpërdorim detyre.
