Gjykata e Posaçme e Apelit për Korrupsionin dhe Krimin e Organizuar ka vendosur më 18 qershor 2025 të lërë në fuqi dënimin për ish-prokurorin e Sarandës, Sali Hasa, duke i hapur rrugë rikthimit të tij në burg për të vuajtur pjesën e mbetur të dënimit.
Vendimi i shkallës së parë, që në fillim parashikonte 3 vite e 6 muaj burg, është reduktuar përfundimisht në 2 vjet e 4 muaj, pas përfitimit të uljes me 1/3 në kuadër të gjykimit të shkurtuar.
Në vendimin e marrë nga trupa gjykuese e përbërë nga gjyqtarët Engert Pëllumbi, Igerta Hysi dhe Iliriana Olldashi, u rrëzua kërkesa e Hasës për zëvendësimin e vuajtjes së dënimit me shërbim prove, siç ishte vendosur më parë. Me këtë ndryshim, ai pritet të vuajë edhe rreth 10 muaj burgim.
Çështja u rikthye për rishqyrtim nga Gjykata e Lartë, e cila kishte prishur një vendim të mëparshëm të Apelit dhe kishte urdhëruar rishqyrimin me një trupë tjetër gjykuese.
Vendimi lë në fuqi deklarimin fajtor të Hasës për veprën penale të “korrupsionit pasiv të gjyqtarëve, prokurorëve dhe funksionarëve të tjerë të drejtësisë”, në lidhje me një episod të ndodhur në vitin 2021.
Sipas SPAK, ish-prokurori kishte marrë ryshfet nga Elsona Papa, motra e shtetasit Emiljano Mirani një person që ndodhej nën hetim nga Hasa, në këmbim të pushimit të procedimit penal ndaj këtij të fundit.
Hetimet zbuluan se Hasa kishte përfituar shuma të konsiderueshme parash dhe u arrestua në qershor të vitit 2021. Bashkë me të, u arrestuan edhe pesë persona të tjerë, të dyshuar për përfshirje në të njëjtin rast korrupsioni.
Gjykata vendosi konfiskimin e një shume prej 1,000 eurosh si provë materiale në favor të shtetit, ndërsa shumën tjetër të sekuestruar prej 1,070,000 lekësh dhe 1,000 euro e urdhëroi t’i kthehet të pandehurit.
Të gjitha shpenzimet gjyqësore, përfshirë ato të gjykimit në apel, do të përballohen nga të pandehurit.
Ky vendim është i ankueshëm në Gjykatën e Lartë brenda 45 ditëve nga data e njoftimit.
