Gjykata e Lartë ka prishur vendimin e Gjykatës së Elbasanit për Florenc Çapjan. Trupa e përbërë nga Ilir Panda, Sokol Binaj dhe Sandër Simoni shqyrtuan rekursin e Prokurorisë së Elbasanit, që kundërshtonte pushmin e çështjes për vrasjen e mbetur në tentativë ndaj ish-efektivit të Policisë Rrugore, Fadil Memës.
Lidhur me ngjarjen, më datë 20 nëntor të vitit 2019, gjyqtari Tomor Kullolli vendosi pushimin e çështjes për Florenc Çapjan, duke e liruar këtë të fundit nga qelia. Lirimi i tij u bë me pretendimin se Gjykata nuk ka prova të mjaftueshme për ta implikuar Çapjan. Të njëjtin vendim mori edhe Apeli i Durrësit. Mungesën e provave e konstatoi edhe gjyqtarja Anita Mici, thuajse një vit më vonë, në 14 prill të vitit 2020, edhe pse Prokuroria kërkoi dënimin me burg për atentatin e mbetur në tentativë. Të dy këta gjyqtarë, janë të shkarkuar nga procesi i Vettingut.
Por, Prokuroria e Elbasanit ka bërë rekurs në Gjykatën e Lartë, e cila ka vendosur sot që ta rikthejë çështjen në Gjykatën e Elbasanit në seancë paraprake. Kështu Çapja do të përballet edhe njëherë me akuzat “Vrasje me paramendim” e mbetur në tentativë dhe “Mbajtja pa leje e armëve luftarake”.
“Prishjen e vendimit nr. 3096 (13-2019-6955), datë 20.11.2019, i Gjykatës së Rrethit Gjyqësor, Elbasan dhe vendimit nr. 10-2020-480 (76), datë 14.04.2020, i Gjykatës së Apelit, Durrës dhe dërgimin e çështjes për rigjykim në Gjykatën e Rrethit Gjyqësor, Elbasan – gjyqtari i seancës paraprake, pranë kësaj gjykate.”
